Es tüecht üs aube nachere so intensive Vorbereitigszyt machts e Knall u üse Jodlerobe ghört der Vergangeheit ah.
Das Johr hei mir üs bsungers gfröit uf das Wucheänd, isches doch üses erschte Konzärt gsi mitem Stefan Müller.
Acht Probe hei mir mit ihm gha für üsi 7 Lieder yzstudiere u z'repetiere. Gstartet hei mir üse Jodlerobe mitem feschtleche Lied "Chilbi im Dorf" vom Hannes Fuhrer, de isches wytergange mitem "Am Morge" vom Franz Stadelmann, passend zum Früehlig isch s'Lied "Nöis Läbe" vom Hannes Fuhrer gsi, wie ou "üsi Aupewäut" vom Josef Dubach hei mir zum Beschte gäh. Dr "Geburtstagsjutz" vom Fredy Wallimann hei mir gspändet übercho vom Ueli Neuenschwander, wie ou "Danke säge" vom Sepp Herger hei mir aus Gschänk übercho vom Stefan Müller- HÄRZLECHE DANK dene zwe Spänder! Aus Zuegab hei mir "e gschänkte Tag" vom Adolf Stähli dörfe vorträge.
Sit emene Zytli hei mir ou wieder e Chlyformation usem Klub gha. D'Monika Wirth u d'Susanne Leuenberger mit dr Örgelibegleitig vor Marianne Kämpfer, si s'erscht mou aus Duett u mit grossem Härzchlopfe uf dr Bühni gstange. Mit de Lieder "Sing doch eis für mi" vom Adolf Stähli, "uf dr Gemsjagd" vom Franz Stadelmann u dr Zuegab "E fröhleche Geissbueb" vom Max Huggler, hei die zwo a jedem Konzärt ihres Beschte gäh. Uf ene wyteri Chlyformation us üsne Reihe hei mir üs am Samschti Nomittag dörfe fröie. D'Monika Lustenberger u dr Küre Bichsel hei mit de Lieder "o Müeti" vom Hans Hofer u "Hüttefüür" vom Ernst Sommer dr Saal usgfüllt.
Am Friti Obe het üses Konzärt s'Schwyzerörgrl-Trio Tüechtiwil vo Steffisburg mit spannender Musig eröffnet. Sie hei üs dr ganz Obe u ou nachem Konzärt geng wieder überrascht, do sie no verschiedeni Instrumänt näbscht de Örgeli hei derbi gha.
Ou dr Jodlerklub Blüemlisalp Scharnachtal unger dr Leitig vom Ueli Isler, hei mir am Friti z'Bsuech gha, mit urchige Stimme u schöne Jütz hei ou sie üses Publikum vouumfänglech ungerhaute.
Am Samschti Nomittag hei üs Nachwuchsörgeler vor Marianne Kämpfer mit ihrene flinke Finger üse Nomittag verschöneret- es ische geng wieder schön, wie die volkstümlechi Musig ou die Junge begeischteret.
Bereits si mir i Samschti Obe gstartet wo mir hei Bsuech usem Baselbiet übercho. Dr Jodlerklub oberer Hauenstein unger dr Leitig vom Patrick Bloch, het üse Obe mit ihrne schöne Stimme u dr fröhleche Usstrahlig bericheret.
Zu lüpfiger Tanzmusig hei mir am Samschti Obe s'Schwyzerörgeli-Trio Schwalbengruess, Hauenstein dörfe begrüesse, mängs Tanzpaar het sech uf d'Bühni trourt für s'Tanzbei zu dere rassige Musig z'schwinge.
Was mieche mir ohni üsi Gastklubs u Ungerhautigsmusig, es härzlechs Dankeschön au üsne Gescht wo dr Wäg uf Choppige uf sech gnoh hei!
Dürs ganze Konzärt het üs d'Jocelyne Moser gfüehrt, mit ihrem Humor, ihrem Lache u dr spontane Wortwahu het sie mängs Schmunzle uf d'Gsichter zouberet- Danke Jocelyne!
Zu jedem Jodlerobe vom Jodlerklub Bärgbrünneli ghört natürli ou e Tombola, wie jedes Johr hei dr Urs Maurer & Team vougas gäh u ne schöni Tombola uf d'Bei gsteut. Ou dr Mage het nid müesse chnurre, einisch meh het üs dr Res Garius & Team mit feiner Choscht versorgt.
Wär de ufem Heiwäg bir Türe verbygloffe isch, het de no i üsi Jodlerbar gfunge u dr Obe gmüetlech chönne loh usplampe.
A dere Steu möchti mir aune wo im Vorder- u Hingergrund so viu mitgschaffet hei für üse Jodlerobe es grosses DANKE widme, ohni öich aui giengs nid u mir si sehr dankbar derfür!